| | 我做得呢個位，有時都會幫阿 ger 請新人，但眼見好多求職者大部份都真係不知所謂，令我漸漸明白同體會到做 recruiter o既苦況。 有幾不知所謂？以下列出幾點常見o既，還望各位求職者可作為借鏡： 1. 求職信及履歷表o既格式及外觀密密麻麻、排位亂七八糟、字體過大/過細、分段不清不楚擠埋一齊 ....... (一日睇幾十封求職信o既 recruiter 邊會有心機睇？畀著我見到就想掉咗佢！睇都唔想睇！) 2. 求職信及履歷表文法及串法 (英文) 錯得離譜。唔係要求好勁o既英文，但都起碼要行文通順流暢丫。如果真係唔識串o既，就唔該查下字典先喇！ 3. 當 recruiter 打電話畀你約見工時，就算果刻唔方便 (甚至未瞓醒)，都唔該，唔該清清喉嚨，提起精神先應電話。約咗個時間、地點時，臨尾都應該再 double confirm 多次。甚至可以問埋：「撘車點去」、「公司大概o既業務性質」等，畀人覺得你對呢份工幾有誠意。呢 d 絕對加分o架！ 4. 如果萬一約見工時你唔想去 in，或者請咗你之後你唔想去做呢份工，都請你至少打個電話通知下 recruiter / 僱主。呢個世界好細，尤其是如果你集中搵一個行業o既工作，第時再撞返o既機會都唔細o架。所以幾時都留返個好印象畀人，絕對有益冇壞。 5. 最後到正式見工果日，準時執正正去見當然唔少得啦~ 我都見過唔少著到 「lau lau 搞搞」、遲大到，甚至放飛機唔出現o既求職者o架。 好多時 recruiter 決定請唔請一個人，o係見面前已經畀咗一半分。如果以上咁基本o既錯失你犯咗其中一項以上，而導致到搵唔到工就真係抵你死，千祈唔好呻經濟差！ |
| | Posted 3/18/2009 12:40 AM - 1 View - 0 eProps - 0 comments
- recommend
  - recs0
- share
- email
 - sent0
|
